Chronique d'Enguerrand de Monstrelet - index L.I-233 - [Comment les Anglois furent destroussez vers Montepiloy. Et le mariage du marquis du Pont. Et autres matières. ]

n après, durans les besongnes dessusdictes, les Anglois de Gournay en Normandie, de Neufchastel d'Encourt (1) et autres de la frontière, avec messire Maulroy de Saint-Léger, qui se tenoient à Creille, s'assemblèrent environ cinq cens combatans et alèrent courir en la Brye et en Valois, où ils prindrent plusieurs hommes prisonniers et ramenèrent grans proies. Mais à leur retour furent rencontrez du seigneur de Gamaches qui se tenoit à Compièngne, et aultres Daulphinois des garnisons du pays, lesquelz leur rescouyrent, vers Montepiloy, ce qu'ils avoient chargé, et bien en mirent à mort soixante, sans ceulx qui y furent prins, et les autres se saulvèrent par fuite. Ouquel rencontre se conduist très vaillamment ledit seigneur de Gamaches.
  Item, en ces propres jours fut fait le mariage de René d'Angou, frère du roy de Cécile, et marquis du Pont par le don du cardinal de Bar son oncle, et de la fille et héritière du duc de Lorraine, et les nopces faictes réalment ou chastel de Nansi le Duc (2). Par le moien de laquelle aliance fut appaisée la grande discorde qui par longtemps avoit esté entre les deux duchez de Bar et de Lorraine. Car dès lors et par avant, ledit cardinal de Bar avoit déclairé ledit René d'Angou son vray hoir et héritier de la duchié de Bar, laquelle chose estoit moult desplaisant au duc des Mons, qui pareillement estoit nepveu audit cardinal, fils de sa sœur. Mais autre chose n'en povoit avoir.
  Et d'autre part, messire Jaques de Harecourt, qui encore feignoit de tenir la partie du duc de Bourgongne, tenoit grosse garnison au Crotoy et faisoit guerre par mer et par terre, dont le roy d'Angleterre, qui en estoit adverti, ne fut pas bien content. Et estoient complices avec ledict messire Jaques, le seigneur de Rambures, messire Loys de Chambronne et son frère Guichart, messire Colart de Chambronne, les deux frères de Herselaines, les enfaus de Chaumont et plusieurs autres gentilz hommes et gens de guerre du pays.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Neufchâtel en Bray.

2 Nancy.