Chronique d'Enguerrand de Monstrelet - index L.II-34- [Comment le duc de Bourgongne fist grandes préparations pour combatre le duc de Glocestre. Et autres matières en brief.]

n ce temps, le duc de Bourgongne fist grandes préparacions, tant en armeures pour son corps comme en paremens de chevaulx, pour estre fourni à la journée prise par luy contre le duc de Glocestre. Et fist forgier la plus grand partie desdictes armeures ou chastel de Hesdin. Et avecques ce, se exercita en toute diligence de sa personne, tant en abstinence de sa bouche, comme en prenant painnes pour luy mettre en alainne. Et pour vray il estoit moult désirant que le jour venist qu'il peuyst venir contre son ennemy et furnir ledit champ, jà soit que son beau frère le duc de Bethfort et son conseil fassent moult désirans que ung bon traictié se y trouvast. Et pareillement se prépara en Angleterre ledit duc de Glocestre.

  En ce temps, par le commandement du duc de Bethfort, asséga le conte de Salseberi le chastel de Ramboulet (1) que tenoient les gens du roy Charles, lesquelz couroient souvent jusques bien près de Paris, en faisant moult de travail au peuple. Toutefois, en conclusion, ils rendirent à icelui conte de Salsebéri ladicte forteresce, en emportant tous leurs biens.

                   

  Environ le saint Jehan Bapstiste, se resmeurent l'un contre l'autre ceulx de la cité de Tournay, et remirent les communes gens plusieurs bannières en leurs franchises. Et si rendirent la ville, pour gouverner et régner avec eulx, comme autrefois avoient fait, à ung nommé Passe-carte, et à ung autre, nommé Bleharie, avec aucunes autres gens de petiz estat qui pour leurs démérites estoient bannis de ladicte ville. Et furent remis dedens à banière desploiée et en armes, en très grand nombre, oultre le gré et consentement des groz bourgois et gouverneurs d'icelle cité. Et meismement par lesdictes communes en furent aucuns emprisonnés et en très grand dangier de leurs vies. Mais nientmains, après ils se rapaisèrent.

  En cest an, requist le Soudant de Babilonne ayde au roy de Thunes (2) en Barbarie, pour mener guerre au royaume de Chippre. Lequel lui fut accordé. Et lors manda par toutes ses seigneuries tous les navires et vaisseaulx d'armes qui y estoient. Desquels il assambla très grand nombre et les fist très bien garnir de vivres et de gens. Et après, soubz la conduite de ses amiraulx et autres capitainnes, les envoia descendre au royaume de Chippre pardevers Saragouce (3). Et lors commencèrent à entrer au pays et à tenir les champs à grand puissance, en faisant maulx irréparables. Et pour ce temps le roy de Cyppre (4) estoit très durement agrevé de maladie. Pour quoy il ordonna son frère, qui estoit prince de Galilée, chief et capitainne général de son armée. Lequel prince assambla toute la puissance d'ycelui royaume de Cyppre, et se retraist pardevers le lieu où estoient yceulx Sarrasins pour les combatre et rebouter. Lesquels, sachans sa venue, se ratrayrent vers leurs navires. Mais il les poursievy, et quand il fu d'eulx approuchié pour les combatre, il trouva que les deux pars de ses gens l'avoient laissié, et par ainsy fu constraint de retourner à Nicosie. Et lesdiz Sarrasins rentrèrent oudit pays, en perséverant de mal en pis, et trestout le désolèrent. Et après qu'ils furent plains et rasasiés de tous biens, à grans rapines et grand foison de prisonniers chrestiens, s'en retournèrent en Surie. Et emmenèrent avecques eulx ung gentil homme nommé Ragonnet de Pioul, lequel avoit esté prins en la grosse tour de Lymechon (5), et le présentèrent au Soudant pour ce qu'il estoit vaillant homme et s'estoit moult viguereusement deffendu. Lequel Soudant l'amonesta forment de renoyer la loy de Jhésu Crist, et l'on promist de le faire grand seigneur. Mais oncques il n'y volt entendre, aincois en la présence d'iceluy Soudant blasmoit moult fort la loy des Sarrasins. Pourquoy ledit Soudant, de ce moult indigné, le fist soyer (6) par le milieu du corps et mettre à mort cruelle. Et depuis fu certifié par plusieurs personnes dignes de foy que sur le lieu où il avait esté enterré avoit-on veu une couronne de feu descendant du ciel en terre et reposer sur le lieu dessusdict.

  Item, après ce que le conte de Salsebéri eust conquis la forteresce de Ramboulet, comme dict est dessus, il ala mettre le siége entour la ville du Mans Saint-Julien (7), où il fut certaine espace, combatant ceulx qui dedens estoient, de toutes pars, à force de ses engiens, et tant, que les habitans d'icelle ville et cité, non espérans avoir souscours, commencèrent à traictier avec ledict conte de Salsebéri. Et meisment, pour ledict traictié avoir, alèrent devers luy l'évesque de la ville et avecques lui aucunes gens d'église, et en grande humilité supplièrent audict conte qu'il les voulsist prendre à mercy, pour eschever l'effusion du sang chrestien. Et lors, icelui conte s'enclina à leurs prières et requestes, et conclud avecques eulx par tel si, que au bout de huit jours ensuivans ils renderoient leur ville en son obéyssance avec tous les habillemens de guerre que dedens avoient, ou cas que à ce jour n'auroient souscours du roy Charles ou de ses commis, et ceulx qui vouldroient faire serement et demou-rer en l'obéyssance du roy Henry, auroient franchement tous leurs biens. Et sur ce baillèrent bons hostaiges d'entretenir ledict traictié. Mais pour tant que au jour dessusdict ne furent point souscourus, rendirent ladicte ville en la main du conte de Salsebéri, lequel le garny très fort de ses gens, et puis retourna à Rouen devers le duc de Bethfort.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Rambouillet.

2 Tunis.

3 Famagouste (à 70 km de Nicosie)

4 Jean II ou Janus

5 Limassol, port de la côte Sud de Chypre.

6 Le fit scier.

7 Le Mans Saint-Julien. Monstrelet désigne par là la ville du Mans, qui en effet a eu pour premier évêque Saint Julien (la cathédrale est dédiée à St Julien).