 |
Chronique
d'Enguerrand de Monstrelet - index
L.II-90 - Comment le duc de Bourgongne envoia le seigneur de Croy en la contée de Namur contre les Liégois. |
 |
 tem, après ce qu'il fut venu à la congnoissance du duc de Bourgongne que l'évesque de Liège et ses Liégeois se préparaient pour entrer en sa contée de Namur , se conclud avec ceulx du conseil de y envoyer le seigneur de Croy, à tout six cens combatans, pour garder la ville de Namur et forteresce du pays. Lequel seigneur de Croy, après ladicte conclusion, se départi de devant Compiengne, avec lui huit cens combatans qu'il avoit en sa charge, et s'en vint à Namur, où les liégeois avoit jà commencié la guerre, et prins Beaufort et bouté le feu. Et ledit Croy, venu audit lieu de Namur, fut dix jours sans faire guerre. Et depuis prist Fosse d'assault, laquelle fut arse, réservé le moustier. Et lendemain, furent mis à fin et mors, à Florines (1), bien soixante ou quatre vins Liégeois, et y eut prins quarante prisonniers. Avec lequel seigneur de Croy estoit son frère messire Jehan de Croy. Si y estoient les seigneurs de Maumisnes, de Reubenpré, de Fauquenberghe et de Durselle, le Galois de Renty, le seigneur de Fremesent, Robert de Noefville et pluiseurs aultres nobles. Ledit seigneur de Reubenpré fut envoyé à Poluache, où il fut à une saillie navré à mort et pris prisonnier. Et depuis y fut mis le seigneur de Senlis, lequel rendi la place aux Liégeois, et puis y boutèrent le feu et l'ardirent. Lesquelz Liégeois, avec leur évesque, estoient bien Lm hommes. Et estoient avec eulx Jehan de Biaurain, Jehan de Soumain, Jehan de Floyon et aultres gentilz hommes. Et depuis qu'ilz eurent prins Poleuache, mirent le siége devant Bouvines. Et si prinrent Golesine et l'ardirent. Durant lequel temps firent les gens dudit seigneur de Croy pluiseurs envayes sur eulx, auxquelles par pluiseurs fois en prinrent et occirent sept ou huit cens.
Source : La chronique
d'Enguerrand de Monstrelet - Tome IV (L.Douët d'Arcq - 1860)
Notes :
1 Florennes.
|
