Chronique d'Enguerrand de Monstrelet - index L.II-92 - Comment ung homme nommé Tommelaire et ceulx de Rains, mirent le siège devant Champigneus.

n ces jours, ung sacqueman nommé Thomelaire, qui estoit prévost de Laon de par le roy Charles, conduisit de cinq à six cens communes de la ville de Rains et des marches à l'environ, et les mena asségier la forteresce de Champigneux (1), dedens laquelle estoient aulcuns Anglois et Bourguignons, qui moult fort oppressoient le pays de Champaigne. Si commencèrent, yceulx asségans, à approuchier de la forteresce de toutes pars, espérans ycelle subjuguer et mettre en leur obéyssance, ce que point n'avint. Car dedens briefz jours ensuivans, Guillaume Coram, anglois, et George de Croix, qui se tenoient à Montagu, assamblèrent ce qu'ils porent avoir de gens, et sans faire long délay alèrent combatre les dessusdictes communes. Lesquelz, sans faire bien grand deffence, furent tantost vaincus, et la plus grand partie furent mors et prins. Toutefois, ledit Thomelaire, avec aulcuns aultres, se sauva. Si en demoura sur la place de six à sept vingts mors, parmy une partie qui furent ars en une maison où ilz s'estoient retrais. Et délaissièrent pluiseurs canons, arbalestres et aulcuns aultres habillemens de guerre qu'ilz y avoient apportés. Après laquelle besongne et qu'ilz eurent la forteresce refournie, les dessusdiz Guillaume Coram et George de Croix s'en retournèrent à Montagu, très joyeux de leur victoire.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Champigneul (Ardennes).