L'abréviateur du procès - index p. 52 à 53 du ms.

ES PREPARATIFZ FAICTZ pour commencer le procez, combien qu'on eust remonstré audit evesque, actendu que ledit procez se faisoit en matiere de foy et par gens d'Eglise, qu'on debvoit metre ladicte Jhenne Pucelle [53] es prisons de l'archevesque de Rouen, toutesfoys le bon seigneur, voullant complaire au roy d'Angleterre et avoir la grace des Angloys, ne le voulut faire ; mais la laissa aux prisons desdits Angloys, ses mortelz ennemys. En quoy il commença a monstrer le vouloir qu'il avoit de faire bonne justice en ce procez, euquel luy et sa compaignie ne se monstrerent pas moins affectez a faire mourir ladicte Pucelle que Cayphe et Anne et les scribes et pharisees se montrerent affectez a faire mourir nostre Seigneur, ainsy qu'on pourra clerement veoir en la deduction dudit procez ; euquel y a plusieurs mensonges, ainsy que j'ay trouvé en deux livres, esquelz est escript le procez de sa condampnacion, ou il y a plusieurs diversitez, specialement es interrogacions et en ses responces. Et aussi est bien prouvé par le procez de son absolucion, le procez de sa condampnacion estoit falcifié en plusieurs lieux.

                                                 

Source : Édition de "La minute française des interrogatoires de Jeanne la Pucelle".1952 - Paul Doncoeur.