Chronique d'Enguerrand de Monstrelet - index L.II-1 - [Comment les nouvelles de la mort du roy Charles le Bien-Amé furent portées au duc de Touraine, Daulfin, son seul filz. Et aultres plusieurs matières.]

n l'an mil quatre cens vint deux, ou mois d'octobre dessusdit, furent portées les nouvelles du trespas du roy Charles le Bien-Amé au duc de Touraine, Daulfin, son seul filz, lequel estoit emprès le Puy en Auvergne, en ung petit chastel nommé Espally, qui estoit à l'évesque du Puy. Lequel Daulfin oyant les nouvelles dessusdictes en eut au cuer grant tristesse, et pleura très habondamment. Et prestement, par l'ordonnance de son conseil, fu vestu de noir, pour la première journée, et lendemain, à sa messe, fu vestu d'une robe de vermeil. Et y avoit plusieurs officiers d'armes vestus de leurs blasons. Sy fu lors levée une banière de France dedens la chappelle, et adonc lesditz officiers commencèrent à cryer hault et cler par plusieurs fois: Vive le Roy ! Après lequel cry fut fait l'office de l'église. Et n'y fut fait pour lors aultre solempnité. Et, de ce jour en avant, tous ceulx tenans son party le nommèrent roy de France.
  Item, après ce que le duc Phelippe de Bourgongne fut retourné en Artois, depuis la mort du roy d'Engleterre, il assembla plusieurs de ses capitaines dedans Arras, et fut conclud que messire Jehan de Luxembourg assemblerait gens pour subjuguer les Daulphinois de la conté de Guise, lesquelz travailloient grandement les marches de Cambrésis et de Vermandois ; et sur ce les assembla autour de Péronne.
  En ces jours, fut le seigneur de l'Isle-Adam mis à plaine délivrance, à la requeste du duc Phelippe de Bourgongne. Lequel par long temps avoit esté détenu dedans la bastille Saint Anthoine, par l'ordonnance du roy Henry d'Angleterre, deffunct. Et fut remis et restitué en ses biens, et avec ce, en partie, de ses offices.
  Item, en ce mesme temps furent envoyez plusieurs chevaliers et escuyers de Picardie à la journée de Saint Walery, pour sommer messire Jaques de Harecourt de le rendre, comme promis l'avoit. Lequel, après ladicte sommation, leur fist faire ouverture de ladicte ville de Saint Walery. Et en demoura cappitaine messire Jehan Blondel.
  La nuit de Saint Martin d'yver de cest an, par certain moyen fait par avant, la ville de Rue fut rendue en la main de messire Jaques de Harecourt, auquel ceulx de la ville firent serment et féaulté pour et ou nom du Daulphin, en violant la paix finalle que autres fois avoient jurée, Et y commist, ledit messire Jaques, pour cappitaine, le seigneur de Verduisant. Et pour ce qu'il avoit peu de gens pour fournir ses forteresses, manda aucuns de ceulx de la conté de Guise, lesquelz gens venus pardevers luy travaillèrent moult le pays de leurs courses.
  Item, en ce mesme temps fut prins dedans le chastel de Choisy-sur-Oise le seigneur de Bosqueaux, lequel par grant temps avoit eu très grant règne en tenant le parti du Daulphin et d'Orléans. Si fut mené à Paris, où il fut décapité et escartelé, pour ce que long temps par avant il avoit occis et mis à mort, par hayne qu'il avoit à lui, messire Guy de Harecourt, baillif de Vermandois.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
/