Chronique d'Enguerrand de Monstrelet - index L.II-15- [Comment deux maistres en ars furent envoyez en la cité de Tournay pour admonester et entretenir le peuple en l'amour du roy Charles. — Et aultres matières.]

n l'an dessusdit, vindrent en la ville de Tournay deux maistres en ars, illecques envoyez par le roy Charles, pour admonester les bourgois et le commun qu'ilz se voulsissent entretenir tousjours en leur bon propos vers ledit roy si comme ilz avoient fait long temps par avant, promectant, par la bouche des dessusdiz, qu'ilz en seroient moult bien guerdonnez au plaisir de Dieu, si le Roy retournoit en sa seigneurie. Lesquelz ambassadeurs furent très honnorablement receuz des nobles et du commun, et leur furent fais beaulx dons, et leurs despens administrez et payez aux despens de la ville très largement. Et après qu'ilz eurent esté en icelle ville et cité de Tournay certaine espace de temps, l'ung retourna en Berry, et l'autre demoura encores à Tournay, faisant plusieurs prédications, en attrayant tousjours iceulx que bien ils s'entretenissent ou parti du Roy. Mais en fin son estat fut amenri, et se refroidirent ceulx de Tournay de lui faire si grans biens qu'ilz lui avoient fait de première venue.

  Ou mois d'avril ensuivant, messire Jehan de Luxembourg assambla ses gens d'armes, et avecques lui, sire Thomas de Rampston, chevalier anglois, lesquelz alèrent mectre le siège devant Oisy en Térace. Et dedens briefz jours ensuivans, traicta le cadet, qui en estoit capitaine, avecques ledit de Luxembourg, par telle condicion qu'il lui rendroit la forteresce au cinquiesme jour de may ensuivant. Et par ainsi se départit le siège; et lui fut rendu au jour dessusdit.

  Auquel an, ledit de Luxembourg asséga l'église de Broissy, laquelle avoient fortiffiée aucuns sacquemans tenans le parti du roy Charles, qui moult faisoient de dommage au pays. Et pareillement asséga la Tour le Borgne. Et furent prins en ces deux places environ quatre vingtz d'iceulx, entre lesquelz estoit ung nommé Le Gros Breton, ung de leurs capitaines. Et furent tous pendus aux arbres assez près de Séry lez Mazières (1).

  En cest an furent ars de feu, de meschief, six cens maisons ou environ de la ville de Saint-Amand, avecques la porte de la bassecourt de l'abbaye et deux chambres de deux moynes dudit lieu, et ne demoura que deux povres maisons entre les deux portes de la ville. Dont le menu peuple de ladicte ville fut tout désolé et eut grant tristesce et troublement.

  En cest an, se rompirent les trièves, qui avoient duré l'espace de treize ans ou environ, entre le Soudan de Babilonne et le roi de Chippre, par le rapport d'aulcuns faulx chrestiens qui rapportèrent au Soudan que les Chippriens occioient ses gens quant ilz les povoient actaindre. Sur lequel rapport, sans aultre deffiance faire au roy de Chippre, ledit Soudan envoya six galées plaines de Sarrasins descendre en Chippre, et faire guerre par feu et par espée. Et premièrement ardirent et destruisirent du tout la ville de Limeçon (2), avecques grant foison d'autre pays. Et lors le roy de Chippre, de ce adverti, adtin de résister, envoya ung sien chevalier, nommé messire Phelippe Prévost, à tout grans gens, lequel venu aux dessusdiz Sarrasins, en escarmuchant à eulx fu féri d'une flesche ou visage, duquel cop il chey, et tantost lesdiz Sarrasins lui tranchièrent le chief et prindrent ses esperons dorés avecques ladicte teste, et se retrayrent en leurs galées, et puis retournèrent en Surie.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Sery-Maizières (Aisne).

2 Limassol.