Chronique d'Enguerrand de Monstrelet - index L.I-242 - [Comment messire Jacques de Harecourt commença à faire guerre aux gens et pays du duc de Bourgongne, et des grans inconvéniens qui à ceste cause en sourdirent.]

n ce temps messire Jaques de Harecourt (1) qui se tenoit au Crotoy et faisoit guerre aux Anglois, comme dit est dessus, se abstint fort de plus hanter ne plus avoir communicacion avecques le duc Phelippe de Bourgongne, ne avecques ses favorables. Et de fait print ou havre d'Estaples ung vaissel chargié de bled, à messire Edmond de Bomber, lequel tenoit la partie dudit duc, et pour ce qu'il ne voult point rendre quant il en fut semons ou requis, s'esmeut soudainement grant guerre entre eulx, laquelle en conclusion fu moult préjudiciable à tout le pays de Pontieu et à l'environ. Car ledit messire Emond, pour vanger son courroux, s'en ala plaindre au lieutenant de Calais, c'est assavoir à messire Jehan Balade. Lequel soudainement print ses souldoiers Anglois de la conté de Guines et de Calais, et par navire les mena et conduist près du Crotoy, et là ardi et brouy toutes les nefz et les vaisseaulx de mer qu'il y trouva, et après se retrahy audit lieu de Calais. Pour laquelle entreprise venger, ledit messire Jaques de Harecourt, à main armée, entra en aucunes des villes dudit messire Emond et les pilla toutes au net, en menant les proies et tous autres biens en ses garnisons de Noyele (2) et du Crotoy. Et tost après ledit messire Emond de Bomber, en rendant le pareil, courut les villes dudit messire Jaques. Et fut du tout entre eulx la guerre esmeue, non pas tant seulement à leur préjudice, mais aussi ou préjudice de tout le pays. Car ledit messire Jaques, pour soy fortifier, actrahit à lui plusieurs hommes d'armes et gens de guerre de Compiengne et d'ailleurs, et aussi se allèrent avecques lui plusieurs gentilz hommes du pays de Vimeu et Ponthieu, avec le seigneur de Rambures et autres, dont dessus est faicte mencion, c'est assavoir Loys de Vaucourt, le Bon de Saveuses, Phelippe de Neufville, Parceval de Houdenc, Pierre Quieret, capitaine d'Araines, et moult d'autres. Si furent tost après mises en sa main la ville de Saint Riquier, et auprès d'icelle les fortresses de Drougy (3), l'isle et chastel du Pont de Remi, les fortresses d'Araines, Drocourt (4) et de Mareul, et à l'autre costé, de Saint Walery, Rambures, Gamaches et aucunes autres, dedens lesquelles, à la poursuite dudit messire Jaques, se boutèrent plusieurs Daulphinois, qui commencèrent à faire guerre ouverte aux pays du duc de Bourgongne et ceulx tenans son parti. Et par ainsi les pays d'environ furent moult fort traveillez. Toutesfoiz, la ville de Saint-Riquier ne se mist pas en l'obéissance dudit messire Jaques jusques à ce que le roy d'Angleterre fut rapasse à revenir en France, comme vous orrez cy-après.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 La Maison d'Harcourt, est une puissante famille normande issue du viking Bernard le Danois. Elle est, avec les Capétiens, l'une des plus anciennes familles de France et l'une des plus anciennes dynasties d'Europe (Wikipedia). Jacques de Harcourt est décédé en 1428.

2 Noyelle-sur-Mer.

3 Drugy, là où fut enfermée Jeanne d'Arc fin 1430.

4 Diaucourt.