Chronique d'Enguerrand de Monstrelet - index L.I-252 - [Comment le duc Phelippe de Bourgongne fist traictié avec ses prisonniers pour la reddicion de Saint-Riquier.]

tem, ou mois de novembre, le duc de Bourgongne, qui estoit moult désirant de bouter les Daulphinois hors de la ville de Saint-Riquier, lesquelz destruisoient moult le pays à l'environ, ung certain jour fist appeler aucuns de ses prisonniers qui estoient ou chastel de Lisle, c'est assavoir des capitaines qui avoient esté prins à la journée de Mons en Vimeu. Lequel duc leur parla sur l'appoinctement de leur raençon, et les vouloit délivrer en lui rendant ladicte ville de Saint Riquier. Et ne leur en parla mie tant seulement une fois, mais plusieurs. Finablement la matière fut tant demenée et pourparlée que les deux parties entendirent audict traicté, lequel en conclusion fut fait entre le duc de bourgongne d'une part, et le seigneur d'Offemont et des capitaines estans à Saint-Riquier, d'autre part. Par lequel traicté fut ordonné que ledit duc mectroit à pleine délivrance tous les prisonniers qu'il avoit du Daulphin soubz bon sauf conduit et les lerroit aler tous quictes sans paier finance, et pareillement ledit seigneur d'Offemont rendroit tous les prisonniers et les acquiteroit de leurs finances. C'est assavoir messire Emond de Bomber, messire Jehan Blondel, Ferry de Mailli, Jehan de Beauvoir, Jehan de Crevecuer et aucuns autres, et avec ce rendroient en la main dudit duc de Bourgongne ladicte ville de Saint-Riquier. Après lequel traictié ainsi fait, mourut audit lieu de Saint Riquier de maladie langoreuse messire Emond de Bomber. Pour la mort duquel ledit duc de Bourgongne fut très mal content, et eut voulenté de rompre ledit traictié; mais il fut rapaisé par ses conseillers, et en fin envoia ses prisonniers soubz bonne garde à Hesdin, et delà par sauf conduit alèrent à Saint-Riquier devers ledit seigneur d'Offemont, qui délivra ses prisonniers qu'il tenoit, si comme promis l'avoit. Et rendi ladicte ville aux seigneurs de Roubaix et de Croy à ce commis par ledit duc de Bourgongne. Et le seigneur d'Offemont, partant de Saint-Riquier, à tout ses gens, ala passer l'eaue de Somme à la Blanquetache, et par Vimeu s'en retourna à Pierrefons, à Crespi en Valois, et autres fortresses à lui obéissans. Et lesdiz de Roubaix et de Croy, après qu'ilz eurent visité ladicte ville et receu les seremens des habitans, ils y commirent capitaines Le Borgne de Fosseux, maistre Nicole de Mailli et son frère Ferry, Nicaise de Bouflers, Jehan d'Encoure et aucuns autres, chascun pour tenir frontière contre messire Jaques de Harecourt.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
/