Chronique d'Enguerrand de Monstrelet - index L.I-263 - [Comment après la reddition de Meaulx plusieurs villes et forteresses se rendirent au roy d'Angleterre.]

tem, le XXIe jour de may de cest an, Katherine de France, royne d'Angleterre, qui long temps paravant estoit relevée de la gésine de son premier filz, nommé Henry comme son père, arriva au port de Harfleur en notable appareil et en grant compaignie de navire plein de hommes d'armes et d'archers, desquelz le duc de Bethfort, frère du roy Henry, estoit chef. Et après qu'ilz eurent prins terre, alèrent à Rouen et de là au Bois de Vincennes, devers le Roy son père et la Royne, sa mère, qui y estoient. Et chevauchoit ladicte royne Katherine en estat royal, toujours ledict duc avecques elle, à très grande puissance de gens d'armes. Auquel lieu (1) ala de Meaulx à l'encontre d'elle ledit roy Henry, son seigneur et mary, avecques ses princes, duquel elle fut receue joieusement comme l'ange de Dieu. Et aussi, du Roy et de la Royne de France, fut faicte toute léesse audit lieu de Vincennes, pour la venue de leur beau filz et de leur fille la Royne. Et le pénultime jour de may, prévigile de la Penthecouste, lesdiz roys et les roynes leurs femmes, se partirent dudit bois de Vincennes et entrèrent en Paris en moult noble estat. Et se logèrent le roy de France et la royne, en l'ostel Saint-Pol, et le roy d'Angletere et la royne sa femme, furent logez ou chastel du Louvre. Esquelz lieux chascun desdiz roys célébrèrent royalment en leursdiz hostelz la solemnité de la Penthecouste, qui lors estoit. Et à cedict jour furent ensemble le roy d'Angleterre, et sa femme tant glorieusement comme pompeusement, à disner, couronnez de leurs précieux dyadèmes. En celle salle séoient aussi à table les ducs, princes et prélats, confannoniers et chevaliers de la gent anglesche, chascun comme à son estat appartenoit. Et furent remplis de plusieurs viandes et de précieux buvrages. Et tindrent à ce jour lesdiz roys et roynes noble court et large, de tous les Anglois qui estoient là venus à ceste feste.

                           

  Et lors, le peuple de Paris alèrent en grant nombre audit chastel du Louvre pour veoir et visiter ledit rov et royne d'Angleterre, séans ensemble et portans couronne. Mais ledict peuple, sans estre administré de boire ne de manger par nul des maistres d'ostel de céans, s'en partirent, contre leur coustume, dont ilz murmurèrent ensemble. Car ou temps passé, quant ilz aloient en si grandes et si haultes besongnes à la cour de leur seigneur et roy de France, ilz estoient festiez et receuz des gouverneurs, de boire et de menger, à sa court, qui estoit à tous ouverte. Et là, ceulx qui se vouloient seoir estoient servis de vins et de viandes, très largement, par les serviteurs du roy. Mais alors le roy Charles, qui tout le temps de sa vie avoit esté comme ses prédécesseurs large et courtois, se séoit en son hostel à Saint-Pol, avecques lui la royne sa compaigne, assez seul et ainsi que tout mis arrière et en oubli des grans seigneurs de son royaume, et aussi des autres. Et pour ce temps estoit yssue et eslongnée toute la puissance dudit rovaume d'icellui roi Charles, et entrée ou arrestée en son beau filz le roy Henry. Et pour lors ledit roy ne gouvernoit point son dit royaume, mais estoit gouverné et mis à néant, ou regard de sa grande et noble puissance qu'il avoit autre fois eue durant son règne, Pour lesquelles choses plusieurs François, bons et loyaulx, avoient au cuer grant tristesse, et non pas sans cause.
Esquelz jours, icellui roy d'Angleterre estant oudit lieu de Paris, fist en icelle ville cueillir la taille des marcs d'argent, dont dessus est faicte mencion, pour forger la nouvelle monnoye, ainsi et par la manière qu'on l'avoit déjà cueilli ailleurs. Si s'en esmeurent plusieurs rumeurs. Mais finablement, pour la crainte et doubte dudit roy Henry, ne osèrent monstrer semblant de nulle désobéissance, ne rebellion.

                      

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 De Vincennes