Chronique d'Enguerrand de Monstrelet - index L.II-38- [Comment le duc de Bourgongne retourna en Hollande et asséga la ville de Zenenberghe, laquelle se rendi à lui. — Et autres matières.]

u commencement de cest an le duc de Bourgongne assambla très grand nombre de gens d'armes de ses pays de Flandres, d'Artois et de Bourgongne, lesquelx, après ce qu'il eust préparé son armée, il mena en Holande devant une forte ville nommée Zenenberghe, qui avec le seigneur d'ycelle tenoit le parti de la duchesse Jaqueline de Bavière, et faisoit forte guerre par terre et par mer à tous ceulx qui avoient fait obéyssance audit duc de Bourgongne. Mais en brief ladicte ville fut très fort environnée, asségié et combatue par ycelui duc de Bourgongne et ses gens. Et d'aultre part les asségiés, qui avec ledit seigneur etoient en très-grand nombre, se tinrent et deffendirent très vaillamment. Mais après ce que le duc de Bourgongne eust par long temps continué son siège, ledit seigneur de Zenenberghe fist traictié avec lui, par si qu'il lui délivra sa ville et forteresce avec la seigneurie et subgectz d'ycelle. Et avec ce rendi sa personne et tous les gentilz hommes qui estoient avec lui en la voulenté dudit duc, sauves leurs vies, prometans de tenir prison honneste par tout où il leur seroit ordonné. Item, fut délivré ès mains dudit duc de Bourgongne ou de ses commis tous les habillemens de guerre estans dedens ladicte ville et chastel, avec tout le navire. Et quand aux soldoyers estranges qui estoient dedens, eurent congié en faisant serement que jamais ne feroient guerre à nul des pays du duc de Bourgongne. Item, furent délivrés franchement tous les prisonniers qui estoient de la partie du duc. Entre lesquels estoient le seigneur de Moyencourt, le damoisel d'Ercle et aultres. Item, tous les bourgois et habitans de la ville firent serement audit duc ou à ses commis, et par ainsy demourèrent paisibles, en payant certaine somme de deniers. Et fut le seigneur de Zenenberghe desvestu de sa ville et de ses biens, et avec ce fut amené à Lille en Flandres. Et ledit duc garny lesdictes ville et forteresce de ses gens, et après ce leva son siège et retourna avec tous les siens en Flandres et en Artois. Mais en faisant lesdiz voiages morurent de impédimie le seigneur de Humbercourt et messire Mauroy de Saint-Légier, avec aucuns autres.

  En cel an, après que le duc de Bethfort eust sousjourné en Angleterre de sept à huit mois, retourna, à sa femme, et trois mille combatans, à Calais, et de là à Paris, où il fut par certaine espace de temps, pour ordonner des affaires de France. Et après ala à Lille, auquel lieu vint devers lui le duc de Bourgongne, qui receut joieusement lui et sa femme. Et là eurent plusieurs consaulx ensamble pour appaisier le discord qui estoit entre le duc de Glocestre et le duc de Bourgongne, mais peu ou nient ilz besongnièrent. Et pour tant, ledit duc de Bethfort s'en retourna à Paris.

  En ce temps le duc de Glocestre fist grans mandemens en Angleterre après le département du duc de Bethfort son frère, en intencion de venir en Holande pour souscourir la duchesse Jaqueline qu'il disoit sa femme. Et s'estoit lors alyé avec le duc de Glocestre contre le duc de Bourgongne, le conte de Salsebéri et plusieurs autres seigneurs d'Angleterre. Ledit duc de Bethfort, sachant ceste emprise, envoia hastivement ses ambaxadeurs en Angleterre devers son frère le duc de Glocestre. Lesquelx ambasadeurs traictèrent tant avec luy qu'il se déporta de sadicte emprise, en impétrant trêves entre les parties jusques à certain espace de temps, espérans de les mettre d'accord. Et firent ceste ambassade l'abbé d'Orcamp et maistre Jehan le Dur.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 /