Chronique d'Enguerrand de Monstrelet - index L.II-50 - Comment ceulx de Tournay s'esmeurent de rechief l'un contre l'autre.

u mois de juillet de cest an, ceulx de Tournay se resmeurent les ungs contre les autres, et furent en armes par plusieurs fois, ainsy qu'ilz avoient autre fois esté. La cause si fut pour ce que les gouverneurs d'ycelle cité avoient mis aucun subside sur les cervoises, pour aider à payer la composicion qu'ilz devoient au duc de Bourgongne. Nientmains, par la diligence d'aucuns des plus sages, ilz se rapaisèrent. Et brief ensuivant fut pries ung de leurs capitaines nommé Jehan Ysacq, orfèvre, pour plusieurs criesmes par lui commis, et avoit esté celui par cuy Ernoul le Musy et Lottart de Villeries avoient esté décapités. Lequel Jehan Ysacq fut pendu publiquement au gibet de Tournay.

  En ce temps, Renier, duc de Bar, fist asségier le chasteau de Passe-Avant (1), dedens lequel estoit ung nommé Eustache de Wernoncourt, qui par long temps avoit très inhumainement et sans miséricorde travaillé le pays à l'environ.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Passavant (Marne)