Chronique d'Enguerrand de Monstrelet - index L.II-62 - Comment le duc de Bourgogne, à la requeste du duc de Bethfort, s'en vint à Paris, où de nouvel ilz reconfermèrent leurs alliances.

e rechief, en ces jours, furent apportées les nouvelles au duc de Bethfort et au grand conseil du roy Henry estans à Paris, de la perte et misérable destruccion de leurs gens. Laquelle leur fut tant anoyeuse et dure à oyr, que les aulcuns en plain conseil en commencèrent à plourer. Et d'aultre part furent advertis comment le roy Charles, à sa puissance, se préparoit et aprestoit pour venir conquerre pays sur eulx. Pour quoy, de par le duc de Bethfort et les Parisiens, fut ordonné de envoyer une sollempnelle ambassade devers le duc Phelippe de Bourgongne, adfin de lui remonstrer les estranges besongnes dessusdictes, et aussi lui requerre que briefment volsist venir à Paris, pour, avec le Régent et le conseil du Roy, avoir advis sur les affaires dessusdictes, qui leur estoient survenues. Lesquelz ambaxadeurs, est assavoir l'évesque de Noyon, deux notables docteurs en théologie de l'Université, et aulcuns aultres des plus puissans bourgois de Paris, vinrent à Hesdin, où ilz trouvèrent ledit duc de Bourgongne. Auquel ilz racomptèrent l'estat de leur ambaxade, en lui réquerrant très instammant, de par son beau frère le régent et les Parisiens, qu'il lui pleust aler à Paris le plus tost que faire se pourrait, pour, avecques eulx, avoir délibéracion et conseil à résister contre leurs adversaires. Laquelle requeste ycelui duc accorda, et leur promist que en dedens briefz jours il seroit en ladicte ville de Paris. Et adonc fist assambler de quatre à cinq cens combatans en ses pays d'Artois et à l'environ, à tout lesquelz il ala en ycelle ville de Paris. Pour la venue duquel fut faite grand joie tant des Parisiens, comme du duc de Bethfort. Et par pluiseurs journées tindrent ensamble de grans consaulx sur les affaires dessusdictes. En la fin desquelz promirent l'un à l'autre, est assavoir les deux ducz de Bethfort et de Bourgongne, que chascun d'eulx, de toute sa puissance, s'emploierait à résister contre l'intention de Charles de Valois, leur adversaire. Et reconfermèrent de rechief les alliances et promesses que long temps par avant ilz avoient faites l'un à l'autre.

  Et après ces choses faites et accomplies, le duc de Bourgongne retourna en son pays d'Artois, et mena sa seur la duchesse de Bethfort avec lui, et le mist demourer et fist tenir son estat à Lens en Artois. Et ledit duc de Bethfort manda sans délay en Angleterre qu'on lui envoîast gens de guerre les plus expers qu'on pourroit finer. Et pareillement fist évocquer toutes les garnisons de Normendie et d'autres lieux de son obéissance, avec tous les nobles et aultres qui avoient acoustumé de eulx armer. Duquel pays d'Angleterre jà pieçà mandés, furent envoyés en l'ayde du dessusdit duc de Bethfort quatre mille combatans ou environ. Desquelz estoit chief et conducteur le cardinal de Wincestre. Lequel passa la mer et s'en vint à Calaix et de là à Amiens. Duquel lieu d'Amiens ledit cardinal ala à Corbie, devers le duc de Bourgongne, et sa belle nièpce, la duchesse de Bethfort, lesquelz, comme dit est dessus, venoient de Paris. Ouquel lieu de Corbie ilz eurent l'un avecques l'autre aucunes brièves conclusions. Depuis lesquelles s'en retourna ledit cardinal à Amiens, et de la mena ses gens d'armes à Rouen, devers le duc de Bethfort, son nepveu, lequel eut grand joie de sa venue.

  En ces jours fut envoyé Jehan, bastard de Saint-Pol, à tout certain nombre de combatans des marches de Picardie, de par le duc de Bourgongne, vers le duc de Bethfort. Lequel lui bailla en gouvernement la ville et forteresse de Meaulx en Brie et l'en fist souverain capitaine, pour le garder contre la puissance du roy Charles, qu'on attendoit chascun jour en ycelui pays.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)