Chronique d'Enguerrand de Monstrelet - index L.II-71 - Comment le duc de Bourgongne envoia ses ambassadeurs à Amiens pour entretenir les habitans d'ycelle de sa partie.

n ces jours, envoia le duc de Bourgongne à Amiens ses ambaxadeurs, est assavoir les évesques de Noyon et d'Arras, le visdame d'Amiens et pluiseurs aultres, adfin de remonstrer au mayeur et aux habitans d'ycelle, la bonne amour et affection que lui et ses prédécesseurs avoient tous jours eu avec eulx ; disant que s'ilz avoient à faire de chose que lui et ses pays peussent, il estoit à leur commandement; requérant en oultre qu'il leur pleust tous jours persévérer et eulx entretenir de son party, comme ses bons amis et voisins. Lesquelz citoyens d'Amiens, eulx véans ainsi honnourés par les messages de si hault et si puissant prince, ilz en eurent grand joie, et dirent entre eulx qu'il seroit bon de mettre la ville en sa garde, et qu'il mist à nient aydes et imposicions. Et firent responce ausdiz ambaxadeurs qu'ilz envoieroient briefment devers ledit duc aulcuns de leurs gens. Laquelle chose ilz firent. Et avec ce y envoierent pareillement ceulx de la ville d'Abbeville, de Monstreuil, de Saint Riquier, Dourlens et aulcunes aultres, pour obtenir la mise jus desdictes gabelles et imposicions. Laquelle chose ne leur fut point par ycelui duc accordée. Mais il leur fut dit que au plus brief qu'il se pourroit, ilz auroient de lui ayde et assistence ad ce impétrer devers le roy Henry.

  Item, en ce temps le duc de Bourgongne fist évoquer par toutes les marches de Picardie tous ceulx qui avoient acoustumé de eulx armer, et aussi ès pays à l'environ, pour estre prestz chascun jour pour aler avec lui où il les vouldroit conduire. Si furent en peu de temps en très grand nombre, et passèrent monstre à Biauquesne, en faisant sairement à messire Jaque de Brimeu ad ce commis, comme mareschal. Si se retrayrent vers Abbeville et Saint Riquier, où ilz furent maint espace, attendant que ledit duc fust prest. Dont le pays fut moult fort oppressé.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)