Chronique d'Enguerrand de Monstrelet - index L.II-79 - Comment en cest an le duc de Bourgongne mist sus un ordre qui fut nommé l'ordre de la Thoison.

tem, en cest an, le duc Phelippe de Bourgongne mist sus en l'onneur de Dieu et de monseigneur saint-Andrieu, duquel en armes il portoit l'ensaigne, une ordre et fraternité de vingt quatre chevaliers sans reproche, gentilz hommes de quatre costés. Auxquelz il donna à chascun d'eulx ung colier d'or moult gentement ouvré de sa devise, est assavoir du fusil (1). Auxquelz coliers, pendoit à chascun sur le devant, à manière que portent les dames et damoiselles, ymages, frémailles et aultres joyaux, une toison d'or en samblance et remembrance de la toison que jadis conquist anciennement Jazon en l'isle de Colcos, comme on le treuve par escript en l'Istoire de Troyes. De laquelle n'est point trouvé en nulle hystoire, quonques nul prince chrestien, on luy (2), eust révélée ne mise sus. Si fut la dessusdicle ordre, à l'ymaginacion de celle que dit est, nommée par ledit duc, l'Ordre de la Thoison d'Or. Et furent, par lui et aulcuns de son conseil, es-leus et nommés pour porter ladicte ordre vingt quatre chevaliers, desquelz les noms s'ensuivent.

  Premiers, y estoit ledit duc, chief et fondateur  d'ycelle, en après y estoit Guillaume de Viane (3), seigneur de Saint-George, messire Renier Pot, seigneur de La Roche, le seigneur de Roubaix, le seigneur de Montagu, messire Roland de Hutquerque, messire Anthoine du Vergi, conte de Dampmartin, messire David de Brimeu, seigneur de Ligni, messire Hue de Lannoy, seigneur de Santes, messire Jehan, seigneur de Commines, messire Anthoine de Toulongon, ma-reschal de Bourgongne, messire Pierre de Luxembourg, conte de Conversen, messire Jehan de La Tremoulle, seigneur de Jonvelles, messire Jehan de Luxembourg, seigneur de Beaurevoir, messire Guillebert de Lannoy, seigneur de Willerval, messire Jehan de Vilers, seigneur de l'Isle-Adam, messire Anthoine, seigneur de Croy et de Renty, messire Florimont de Brimeu, seigneur de Massicourt, messire Robert, seigneur de Mamimes, messire Jaque de Brimeu, seigneur de Grigni, messire Baudouin de Lannoy, seigneur de Moulenbais, messire Pierre de Bauffremont, seigneur de Chargni, messire Phelippe, seigneur de Teurnant, messire Jehan, seigneur de Créqui, messire Jehan de Croy, seigneur de Tours sur Marne.

                                       

  Lesquelz chevaliers, comme dit est, au recepvoir ladicte ordre, firent, et debvoient faire leurs successeurs, pluiseurs sollempnelles promesses et notables ordonnances pour l'entretenement d'ycelle, desquelles cy après en ce présent livre sera faite mencion plus à plain, après que ladicte ordre sera du tout parfurnie en son droit nombre. Car depuis que les dessus nommés y furent mis, certain espace de temps après en y eut adjoustés aulcuns aultres. Si debvoient les hoirs d'yceulz chevaliers renvoyer après leur trespas audit duc de Bourgongne ledit colier, pour le bailler à ung autre chevalier.
  

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Ce fusil, ou briquet, qui se trouve sur les monnaies et sur d'autres monuments, avait à peu près la figure d'un B couché sur sa haste et dont les panses ne se toucheraient pas au milieu.

2 Avant lui.

3 J. Guillaume de Vienne.