Chronique d'Enguerrand de Monstrelet - index L.II-97 - Comment le mareschal de Boussac ala asségier le chastel de Clermont en Biauvoisis.

tem, durant les tribulations dessusdictes, le mareschal de Boussac assambla la plus grand partie des François qui avoient esté à lever le siège de Compiengne. Si fist chargier plusieurs engiens et habillemens de guerre. Si s'en ala mettre le siège autour du chastel de Clermont en Biauvoisis, par introduction et pourchas d'aucuns bourgois de la ville. Dedens laquelle ville lui et ses gens se logèrent. Ouquel chastel estoient le seigneur de Crièvecuer, son frère Jehan de Bazentin, le bastard de Lanion, avec environ cinquante combatans, qui très viguereusement se mirent à deffence contre yceulx asségans, qui par pluiseurs fois les assaillirent, mais ce fut sans riens gaignier, et y eut plusieurs de leurs gens occis et bléciés. Nientmains, ils continuèrent leur siège environ dix jours. Au bout duquel terme entra par nuit dedens ledit chastel, par la posterne vers les vignes, Boort de Bazentin, avec lui dix combatans et une trompette, lequel adcertifia audit seigneur de Crièvecuer qu'il aurait brief secours; comme c'estoit vérité. Car le conte de Hontiton, qui puis nagaires s'estoit retrait à Gournay en Normendie, s'estoit de nouvel remis sur les champs, avec lui Jehan, bastard de Saint-Pol, et mil combatans ou environ, en intencion d'aler lever ledit siège et souscourir les asségiés. Duquel secours yceulx asségans furent advertis, et pour tant se départirent ung matin moult hastivement, et y laissèrent plusieurs gros engiens qu'ilz avoient gaignié devant Compiengne. Si retournèrent en leurs garnisons, et avec eulx plusieurs Bourguignons de Clermont qui s'estoient tournés de leur party. Pour lequel département ledit seigneur de Crièvecuer fut moult joyeux.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 /