Chronique de la Pucelle - index 26 - Le Duc d'Alençon délivré ; sa rançon. Le Lude pris d'assaut par les Français - discorde entre les favoris du Roi - Le sire de Prie tué devant Bourges

n ce temps, le duc d'Alençon qui avoit esté prisonnier à la bataille de Verneuil, fut délivré des Anglois et paya bien deux cent mille escus dont il paya une partie comptant et de l'autre bailla pour ostages le sire de Beaumesnil, Messire Jean le Verrier, Ferron de Villeprouvée, Hardouin de Montlorées (1), Jean le Séneschal, Hue de Fontenay et le seigneur de Boisseneur ; et puis fit telle diligence qu'il mit ses ostages à pleine délivrance : pour quoy faire il vendit sa terre et seigneurie de Fougères, afin de leur tenir ce qu'il leur avoit promis, et luy cousta en oultre tout ce qu'il avoit et peut finer de meubles.
  Assez tost après, les seigneurs de Rais et de Beaumanoir feisrent une armée et assemblèrent des François ce qu'ils peurent et mirent le siège devant une place nommée le Lude, sur la rivière du Loir, de laquelle estoit capitaine un Anglois nommé Blanqueborne, qui avoit en sa compaignée de vaillans Anglois bien garnis de vivres et d'habillemens de guerre et lesdits seigneurs y firent asseoir certains canons, tellement que ladite place fut bien batue en aucun lieux, puis assaillie et prise d'assant par les François. Là furent tuez ou pris plusieurs Anglois, et par espécial y fut tué ledit Blanqueborne, capitaine de la place.
  Audict temps, avoit toujours des débats et brouillis, touchant le faict du gouvernement du royaume, et le duc de Bourbon (2), le connestable, le comte de la Marche et autres seigneurs estoient mal contens de ce que le roy n'entendoit autrement au gouvernement de son royaume et à la deffense d'iceluy contre ses ennemis. Pourquoy ils s'en vinrent à Bourges et entrèrent dedans, puis mirent le siège devant la tour, en laquelle estoit un vaillant chevalier nommé le seigneur de Prye, leduel fut plusieurs fois sommé de bailler la place. Mais il respondoit toujours, que le roy la luy avoit baillé et qu' il ne la rendroit à autre sinon à luy. Il y eut de diverses escarmouches, et un jour que ledit de Prye entendoit (3) à la deffense de la place, il fut frappé d'un vireton, dont il alla de vie à trépas. Ce nonobstant, le seigneur de la Borde (4) tint ladite place contre lesdits seigneurs. La chose venue à la cognoissance du roy il se partit de Poitiers et le seigneur de la Trémouille avec luy ; si vinrent devant Bourges, et estoit le roy très malcontent desdits seigneurs et de leur manière de faire. Enfin leur paix fut faicte par le moyen dudict seigneur de la Trémouille, lequel y travailla de tout son pouvoir, puis le roy entra à Bourges, et firent très bonne chère ensemble.

                                                 

Source : édition Vallet de Viriville - éd.1859

Notes :
1 ou de Monbroez.

2 Il désigne ainsi Charles de Bourbon, comte de Clermont. Il fut Duc en 1434 après son père qui mourut en Angleterre, prisonnier d'Azincourt.

3 S'employait, en anglais : intended

4 Philippe de Melun.