Chronique de la Pucelle - index 27 - Recouvrement et perte du Mans.

' an mil quatre cent vingt huit (1), aucuns seigneurs entreprirent d'entrer dedans la cité du Mans ; et y avoit aucuns des habitants de la ville qui se faisoient fort de bouter les François dedans et à ce faire mirent grand peine et diligence. A exécuter la dicte entreprise estoient le seigneur d'Orval, frère du seigneur d'Albret, le sire  de Bueil, le seigneur de Beaumanoir, Estienne de Vignoles dit La Hire, Roberton des Croix, et plusieurs autres capitaines et gens de guerre ; lesquels vinrent devant la place au jour qui leur avoit esté dit et assigné et entrèrent assez soudainement dans la cité par le moyen desdicts habitants, dont ceux de la ville furent bien esbahis et mesmement les Anglois estans en icelle. Par quoy ils se retirèrent en une tour appelée la Tour Ribendèle, assise près d'une des portes de la dicte ville, appellée la porte Sainct-Vincent, laquelle les Anglois tinrent avec ladite tour, et se deffendirent fort et résistèrent tout le jour très vaillamment contre lesdits François.
  Or, est vray que le seigneur de Talbot, un vaillant chevalier anglois, estoit à Alençon et avoit assemblé grand foison d'Anglois, pour certaine entreprise qu'il avoit sur les François. Les Anglois de la dite tour se voyans en tel party, luy envoyèrent demander secours ; et tantost qu'il en sceust les nouvelles, vint hastivement audit lieu du Mans à tout environ de trois à quatre cents combatans, et arriva entre le point du jour et le soleil levant auxdites tours et portes, où les François mal advisez et conseillez n'avoient mis aucune provision et fortification ; mais estoient en leurs licts et logis, où le soir ils avoient faict bonne chère ; puis entra dedans la ville criant : Sainct-Georges.

  Les François furent de ce bien esbahis, dont les uns montèrent hastivement à cheval et partirent hors de la dicte ville ; les autres résistèrent le mieux qu'ils peurent, mais la plus grande partie furent tuez et pris. Assez tost après survint le seigneur de Beaumanoir qui cuida rebouter ledit Talbot, mais il ne trouva aucun ayde et pour ce s'en retourna et ainsi ladicte cité fut recouvrée par ledit Talbot, lequel fit incontinent enquérir des consentans de l'entrée faicte par les François et en trouva aucuns, si les prist et les fist piteusement mourir, et si fist punition de ceux qui avoient aucunement fait semblant d'être joyeux de la dite entrée, et y moururent des François plusieurs gens de bien.

                                                 

Source : édition Vallet de Viriville - éd.1859

Notes :
1 Pâques le 4 avril.