Chronique d'Enguerrand de Monstrelet - index L.II-101 - Comment Pothon de Sainte-Treille et messire Loys de Waucourt furent prins des Anglois.

tem, en l'an dessusdit, le mareschal de Boussac, Pothon de Sainte-Treille et messire Loys de Waucourt, et aulcuns aultres capitaines tenans le parti du roi Charles, accompaigniés de huit cens combatans ou environ, se partirent de la ville de Beauvais pour aler quérir leur aventure et fourer le pays envers Gournay en Normendie. Avec lesquelz y estoit ung, que les François nommoient Pastourel, et le vouloient exaulcier en renommée, comme et par telle manière que paravant avoit esté Jehenne la Pucelle. Si fut sceue leur entreprinse et reportée au conte de Warwich, lequel, en grand diligence, assambla jusques à six cens combatans ou environ, et chevaulcha en tirant de Gournay à Beauvais, et rencontra ses ennemis, qui point ne se doubtoient de sa venue, auprès d'une ville nommée.... (1) Lesquelz, de luy et de ses Anglois furent asprement assaillis, et en fin, sans ce que par eulx feust faite grand deffence, furent desconfis et mis en desroy. Et furent prins de première venue Pothon de Sainte-Treille, messire Loys de Waucourt, et avec eulx soixante combatans ou environ, et les aultres, réservés huit ou dix qui furent mors, se sauvèrent avec ledit mareschal, en retournant à Beauvais. Auprès duquel lieu furent par yceulx Anglois poursuivis et rechaciés moult vivement. Et après, ledit conte de Warwick rassambla ses gens et retourna à Gournay, moult joyeux de sa bonne aventure, et depuis, à Rouen, vers le duc de Bethfort, duquel ilz furent joyeusement receus.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Le Ms.8346 laisse le nom en blanc. Vérard donne la leçon absurde de Gournay.