Chronique d'Enguerrand de Monstrelet - index L.I-256 - [Comment messire Jehan de Luxembourg ala devers le roy d'Angleterre pour la délivrance du conte de Conversen son frère ; et autres matières.]

n ce temps messire Jehan de Luxembourg ala, à petite compaignie, devers le roy Henry d'Angleterre, à son siège de Meaulx, pour traicter de la délivrance du conte de Conversen, son frère, lequel jà par long temps avoit esté prisonnier et encores estoit, dedens icelle ville, à Péron de Lupe. Et lui là venu, fist et traicta tant par le moien et aide dudit roy d'Angleterre, que son frère fut délivré de prison moiennant grande somme de pécune qui fut promise à délivrer et paier audit de Lupe à jour assigné. Et depuis sa délivrance ledit conte de Conversen démoura ou service du roy durant ledit siège de Meaulx. Et ledit messire Jehan de Luxembourg retourna en Picardie dont il estoit capitaine général, et en sa compaignie messire Hue de Lannoy, qui nouvellement avoit esté constitué maistre des arbalestriers de France et pour les deux roys de France et d'Angleterre.
  Item, en ce temps dame Katherine de France, royne d'Angleterre, s'acoucha d'un filz oudit royaume d'Angleterre (1), lequel par l'ordonnance du roy son père fut nommé Henry. Et, avec les autres qui estoient à ce commis, le leva de fons Jaqueline de Bavière, duchesse de Brabant, qui lors estoit oudit pays d'Angleterre. Pour la nativité duquel, ledit roy Henry eut moult grant joye, et par tout son royaume d'Angleterre fut aussi menée grant joye plus que par long temps n'avoit esté veu de nulz autres enfans royaux.
  Item, en ce temps les Daulphinois prindrent d'emblée la ville d'Avrenches que tenoient les Anglois. Desquelz y eut, que mors que prins, de deux à trois cens. Dont moult despleut au roy d'Angleterre quant ce fut venu à sa congnoissance, et y envoya, de son siège de Meaulx, certain nombre de gens en l'aide du conte de Salebery, qui estoit gouverneur de toute Nor-mendie. Lequel fist si bonne diligence que icelle ville fut reconquise, et plusieurs des Daulphinois mors et prins.
  Item, en ce mesme temps ou environ, Artur, conte de Richemont, frère au duc de Bretaigne, retourna de la prison du roy d'Angleterre en France, par certain traictié, et après sa délivrance vint, à tout grant nombre de gens d'armes, audit siège de Meaulx, servir ledit roy d'Angleterre. Ouquel service il demoura durant la vie d'icelluy roy.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Au château de Windsor, le 6 décembre ; Hoc etiam anno domina Katherina regina Anglix peperit filium suum primogenitum, apud castrum suum de Windeshora, die sancti Nicholai episcopi et confessoris, et vocatum est nomen Henricus (Walsingham, Hist. brev., p. 455).