Chronique d'Enguerrand de Monstrelet - index L.II-54 - Comment grans tournoiemens se firent en la ville de Bruxelles.

n ces mesmes jours le duc de Bourgongne ala, très grandement acompaigné de pluiseurs seigneurs de ses pays, en la ville de Bruxelles, pour estre à ung tournoiement qui là devoit estre fait le jour des quaremiaulx (1). Duquel tournoiement estoit le chef, le filz du damoisel de Gazebeque; est assavoir de donner le pris. Auquel lieu le duc de Bourgongne fut honnorablement receu et festoyé du duc Phelippe de Brabant, son cousin germain, et des aultres seigneurs du pays, et aussy de ceulx de ladicte ville de Bruxelles. Et quand ce vint au jour que ledit tournoiement se debvoit faire, les deux ducz dessusdiz furent partis l'un contre l'autre, et pareillement grand partie de leurs gens, par advis et delibéracion d'aucuns saiges de leurs consaulx et des officiers d'armes, adfin de eschever toutes rigueurs qui peussent advenir. Et furent ce jour, tant d'un costé comme d'autre, de sept à huit vingt heaumes sur la place, est assavoir sur le marché de Bruxelles. Et estoit grand noblesse de les veoir. Car ils estoient tous moult richement habillés et parés de leurs armes. Et quand ce vint que lesdiz officiers d'armes eurent fait tes cris en ces cas acoustumés, ilz se férirent de grand voulenté l'un parmy l'autre, et y eut maint riche cop féru entre ycelles parties. Et en la fin fut le pris donné à ung gentil homme de Brabant nommé Jehan Linquart. Et lendemain et second jour, furent faites grans joustes. Entre lesquielx, pour le premier jour, emporta le pris le duc de Brabant, et pour le second, le seigneur de Mamines. Et quant aux dansses et banques, il en y eut fait en très grand habondance. Et y avoit largement dames et damoiselles, moult richement parées selong l'estat du pays. Et au regard de mommeries, tant d'hommes comme de femmes, il en y avoit largement. Durant laquelle feste fut baillée l'espée au seigneur de Croy, chevalier dudit duc de Bourgogne. Lequel, par le conseil, fist de rechef crier ung autre tournoiement à ung certain jour ensuivant, pour estre assamblé et furny en la ville de Mons en Haynau. Lequel, pour certaines occupations qui survindrent dedens ledit jour, ne se fist point. Et après que le dessusdit duc de Bourgongne eust sousjourné dedens ycelle ville de Bruxelles quatre ou cinq jours, il s'en retourna en son pays de Flandres, non obstant que durant le temps dessusdit il faisoit très divers temps, tant de nesges comme de gellées. Et les autres seigneurs se retrayrent ès lieux dont ilz estoient venus.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Le jour de la mi-carème.