Chronique d'Enguerrand de Monstrelet - index L.II-75 - Comment le seigneur de Saveuses et le bastard de Saint Pol furent prins devant Paris par les François, et comment d'autres François la ville de Saint-Denis fut prinse et eschiellée.

n ce mesme temps, le duc de Bourgongne envoia le seigneur de Saveuses et Jehan de Brimeu, à tout cinq cens combatans ou environ, pour conforter et aidier les Parisiens contre les François, qui chascun jour couroient devant ladicte ville à tous lez, et leur faisoient moult d'oppressions. Lesquelz se logèrent dedens Saint-Denis, et firent par pluiseurs fois des envayes contre leurs ennemis. Nientmains, ung certain jour, yceulx François, de pluiseurs garnisons vers le costé de Mont-le-Héry, vindrent courre auprès dudit lieu de Paris. Et avoient laissé une grosse embusche en ung village là environ. Si estoient alors dedens ladicte ville le seigneur de Saveuse et messire Jehan, le bastard de Saint Pol, lesquelz, oyans l'effroy, montèrent hastivement à cheval, à petite compaignie, et sans attendre leurs gens, alèrent incontinent aux champs et poursuivirent viguereusement lesdiz François. Lesquelz, en fuyant, les atrayrent jusques bien près de leurdicte embusche. Et là tantost, non pouvans ad ce résister, furent en assez brief terme tous deux prins prisonniers et emmenés des dessusdiz François en leur forteresce, avec aulcuns de leurs gens, non point en grand nombre. Sy fut le bastard de Saint Pol très fort blécié, au prendre, d'une lance au col, dont il fut en grand péril de perdre la vie. Nientmains les deux chevaliers dessusdiz retournèrent en assez briefz jours en la ville de Paris, parmi grand finance qu'ilz payèrent à ceulx qui les avoient prins. Dont leurs gens furent moult resjoys, quand ilz les virent.

                        
                 
  D'aultre costé, en ce temps, les gens qui estoient soubz Alain Gerou, Gauchier de Bruissart et aulcuns aultres capitaines, vinrent à un point du jour en la ville de Saint-Denis, dedens laquelle estoit venu nouvellement Jehan de Brimeu, à tout certain nombre de compaignons qu'il avoit amenés du pays d'Artois, et avec lui estoient les gens du seigneur de Saveuses. Si entrèrent dedens par eschielles une partie d'yceulx François, et ouvrirent une des portes par où les autres en très grand nombre se boutèrent dedens. Et commencèrent en pluiseurs lieux à crier, ville gaignée! en abatant huis et fenestres, et envayssant pluiseurs maisons où estoient leurs ennemis. Lesquelz, oyans ainsi soubdainement si grans cris parmi la ville, furent tous effraiés. Si se traisent tantost eu aulcuns fors lieux d'ycelle, est assavoir Jehan de Brimeu et pluiseurs avec lui, en l'abbaye, le bastard de Saveuse en la porte de Paris, et les aultres se mirent en aulcunes portes et tours, à sauveté. Et d'aultre part en y eut grand partie qui en yssant de leurs logis, contendans à aler devers leurs capitaines ou à eulx assambler, furent prins prisonniers, et les aulcuns occis. Entre lesquelz furent prins Florimont de......(1), Anthoine de Wistoc, Thieri de Malinghehem, et douze à seize autres, desquelz il en y avoit une partie gentilshommes. Et y furent mors Estevenin de Thenequettes, Jehan de Haute Cloche, et aulcuns aultres en petit nombre. Durant lesquelles besongnes les gens des dessusdiz seigneurs et Jehan de Brimeu reprinrent vigueur en eulx, et commencèrent à eulx assambler en aulcuns lieux, au cry et par introduction de ung vaillant homme d'armes, nommé Guillaume de Beauval, lequel en grand hardiesse rassambla aucuns de ceulx de leur parti, et envay ses ennemis, qui en pluiseurs parties, sans tenir grande ordonnance, entendoient au pillier. Finablement ilz furent reboutés dehors, et mesmement y perdirent aulcuns de leurs gens jusques au nombre de huit ou dix. Et alors, le seigneur de Saveuses, qui estoit dedens Paris, oyant ces nouvelles, assambla hastivement ce qu'il put avoir de gens, et sans délay chevaulcha viguereusement devers ladicte ville de Saint-Denis, en intencion de bailler souscours à ses gens. Mais avant qu'il y peust venir, yceulx François s'estaient retrais devers Senlis et les aultres garnisons, et avoient emmené grand nombre de chevaulx de ceulx de la ville.

  Item, en ce temps furent asségiés des Anglois le seigneur de Rambures dedens la forteresce d'Esterpaigni (2), appartenant héritablement au conte de Tancarville. Devant laquelle, yceulx Anglois tant continuèrent de combatre par leurs engiens et aultrement, que en conclusion ledit seigneur de Rambures, non ayant espérance d'avoir souscours, fist traictié avec yceulx Anglois en eulx rendant ladicte forteresce, par condicion que lui et ses gens, à tout leurs biens, se départiraient sauvement.

                                                 

Source : La chronique d'Enguerrand de Monstrelet - Tome IV (L.Douët d'Arcq - 1860)

Notes :
1 Un mot en blanc

2 Estrepagny près Gisors.